喺一個繁忙嘅朝早，某幢大廈裡面，𨋢門一打開就有個柒人跑啊跑啊跑 ……
「唉！又送車尾 …… 已經成個月都係咁啦 ……」
隔離施施然行埋黎嘅人兄：「啊今日真係好彩，一落樓就有車，唔洗哂時間等到身水身汗～」
已經大汗淋漓嘅柒人好嬲：「點解！！點解好運嘅人有咁多好處！而我柒就淨係得一殼眼淚！！」
我就係一個咁樣嘅人。我喺車度大大聲咒罵老細，老細就一定係坐喺後面；趕時間，就一定會送車尾，再唔係就搭錯車；喺 Whatsapp 講人壞話，一定會唔小心 send 左比佢本人；我唔帶遮，就一定會落狗屎 ……
過左咁多年，雖然已經接受左呢個事實，但每日都係會詛咒上天。但諗諗下，既然李光洙既黑仔都可以咁好笑，我仲坐喺度怨天尤人實在太浪費，一定要好好發揮我嘅專長：柒！
一開始，大家都只係分享吓柒事笑下，但講講下越嚟越多，覺得唔記低實在太可惜啦，所以我哋就決定好好記錄大家嘅柒事，將「柒」變成一種生活態度、一種正能量！
